Healing is yours_Dimasa

Don-somphothi, laisi-laibra, man-sonman khrip jadi subung niha dongthardu thikhabo lengoma, khajathai, santhi ode sao hamma habsaoha maiphuya. Khajama, santhi khe maimane subung hamsining dukhu khlaidu, bonsi rang khorso khlaidu phap ni khajathai ha khajadu thikhabo bonsi musi maidaoya. Ebobuthude khaha lengse lengthairiba ode saomang ha bimar ar thithai sening labuba thikhabo ebo khe musi subung buthu tharmaiphuya.

Madai subung khe sangsai jenbaha, jarni saogarilai sening subung khe Madai sangsaiya, khajathai, santhi, lengoma, sao hamyahba ode thaoglaoni khlaihise sangsaiba. Thikhabo jekhali subung Madai ni grao khe phaikha ode phap jakha, hamthai khesening maiyaba khe garhi bonsi bol girikha ode saoha biyadi hamyayaba bimar maikha ode bonsi thithai, khinma ode bese ni dukhu ni leng jama glaikha.

Doctor rao gibin gibin bimar khe hamridu ode sgo-sgain jang hamya khlaijaoyarao khebo hamridu thikhabo hamsosi subung khe hamriphuya. Muli gdain gdainbo baigophalangdu ode bimarbo gdain gdain baigophalangdu ode bakhalbaide Doctor raobo gmang giji jadu. Ebo Jugkhon jug ha nini bimar khe doctor hamriphunang na hamriphuya ning gmang giji jalaphure.

Lugurao, jing ninthane saosi Doctor jang basao mithilairinang. Lonmah jang ning Boni ha phaikhade ning khriph jadi maitharnang. Subung ni khlaihi Boning sao naiyah hamdaothao. Boni bumu jakha Jisu, elai thidu, “Angde nisini bimar hamriyahba Gabarase” (Exo 15:26)….boni mainthi jang jing hamba”. Bo jinni dukhu hadi ar bimar buthu khe langtharlakha”. Isa53:5; Mathew 8:17). Bo jing khe elai thihi jirikhdu, “nisi bakho bubain risiyaba babani lengjaoyarao Ani ha phai, Ang nisine lengoma rinang” (Mathew 11:28). Jisude Phap limmah-sahma ode sahrithai odehe thithai ni basaohabo detharkha ode thaoglaoni khlaihi thahnghi dong. Odehe Bokhe lonyahraosi bo dethai khe maima thihi graosmai riba!

Ning jarni phap khe Jisu niha sikhar khlaihi Jisu khe jarni sgoyah thihi ajaokhade, Bo nini phap khe maph khlaibasening niyahi ninthane bese ni lengoma rinang, nini bimar buthu khe langtharlanang ode ning hamsosi hamnang. “Bode nini khriph phap khebo maph khlaidu ode khrip bimar khebo hamridu. “Longkhor niphrang nini hahyu khe sgoyahbase” (Psams 103:3,4). Bo Boni grao khe haihaba ode bonsi khe hamriba; mangkhlung niphrang bonsi khe sgoba” Psams 107:20). Madai ni Graothai elai thidu, “Bo jarni saoha, Khross ha jinni phap buthu khe horlaba, boni mainthi jangse ning hamba” (1 Peter 2:24).

Bimari rao khe nuhi, Jisu khasaoma jang sgangphalangba. Khunthi jayarao ji khe Bo hamriba. Boni niphrang raothai baigo langba ode haingajikh saosi boni thi jang hamlangba. Bimar hasar jayarao, Jisu niha phaiyaraosi khripbo hamtharba. Bo gana khe nuphinriba, nathong khe khnaphinriba, abra khe joriba ode lengra khe hemriba. Gthi khebo Bo mthangphinba. Miyahabo, dinibo ode thaoglao ni khlaihibo Jisude baosise. Dinibo Bode musi bimar hamriphuyayaba giri.

Medical science ode surgery khlaihi subung khe saomang ha hamrilaphure. Thikhabo sorgo ni sao naiyah gmangthaosisi magna jang hamridu. Saomang khe hamriba khe garhibo Jisude kha, bese ode subung ni asaba khebo hamridu.

Odejang, ning duhaning hamma nangjaokhade niniha asaba bimarbo donglathing, ar doctor ning khe hamriphuyakha thihi yao garkhade, sorgo ni sao naiyah Jisu niha khrip jadi khe yaophatharla ode elai Madai bih:

“O Gabara Jisu, Ang londu ning ani phap ni khlaihi sening Calvary khross thiya, ani bimar ni khlaihibo thibase. Khasaohi ani phap buthu khe maph khlai, limah-sahma niphrang ang khe sgo odehe ang khe hamsosi hamri. Ang nini basa rgaosisiya jahi dongma nangjaodu. Amen.

Ar mithidaosingmani khlaihi eraha rikhi: contact@sweethourofprayer.net

You can find equivalent English tract @

Healing is yours!