NALI CHINGRI HAIRANU (Peace be unto you)
Kayakha kashima kala ningyang khaunga tuikhala! Chingrikahai hi mikumo wuklungna kakahao kala ningkachangna. Mi thingthingna phashang phatai, kha katavali khalei thada masamphangrar mana. Chingrikahai kaho hi malokhuipai mana, awor einala masamphangrar mana kala aming kazat chieina la masuikhuirar mana. Nala chingrikahai chi phaya, kha masamphang mara. Chingrikahai makhalei tharan kayakha shida wuk-kakhanang malung khavat samphang khala kala nakhalatdawui mirin sashiman khavai kayakha shida sakhala? Chingrihai khavai khamarip otsak eina phazatsalapai, kha hunakha manga. Ningli ot kasa kala phasa phakhavai ngatha khayak laga thuklak eina machuklala chingri kahai masamphang rarmana. Aruihon ithumli chitheikhami chiya; chingrikahai samphang khavai khalatda wui thangmet eina hotnada khaleibing chungmei dana kuingatok, ningphaningli angaran apam-apai maphakhuimana. Kachi katha kaikhana khalatda tuknar laga chingrikahai samphang khavai sai. Kha phalala masamphang mana. Okathui wui eina khayambing khalatda shiman khavai apong samphanga. Ithumna chingrikahai kala ninganungkhung kahai masamphangrar akha ithumwui mirin hi khi sakhavai khami khala?
Hili shongfa chitheida khalei maram hina nathumli Varewui Naohonaotonga chili zakmai kachitheina, ngashitmikahai kala akachanga chingrikahai chi AWUI li lei. Ana hanga, “Ina chingrikahai nathumli haikhamina, I khalattawui chingrikahai nathumli khamina…wukmakhanang lak alu, khangacheela mangachee alu”. Tuibing hi khamasai tui maningmana, kha nali leishida mangla chikatmi kahaiya kharinga wui tuina. Khipakhana chingrikahai mamirarlak mana, kha sashap pangshapa nali ngashitmi kahaiya wuili lei. Ali Chingri kahai Wungnao hoi, chi Jesu Christana.
Nana hithada hanglapai, “Kha Jesu hiya iwuivang maningmana, imik eina awui azak matheimana kala makatheiya chili ina kathada khuisangra khala?” kha nawui vang Jesu Christana da phaningda leiyakha, chingrikahai samphang hairara. Kha Christahi khisada akachang maningthu; na khamashung khangarong chi mapha mana kala nakhalatda wuili khalei morei chinana. Ithumwui wuklungna kapha-kashi thei, kha mashun makhui chili manganakasang tharan ithumwui vang ngashitkhamiya chingrikahai wui khavao khon mashathumana. Machukyangsa kharinga tuili hangkahai, “nathumna iwui ningkhamibing chi nganakhuihaisasi kaja, nathumwui chingrikahai chi kong thahairara, kala nathumwui khamashung yirei khangaphao thahairara” (Isaiah 48:18). Ithum na ithumwui morei vareli hangphatakha ana awui tuingashit chi mangapatlak mara kala mashung mira. Ithumwui moreila pheomida khayon sakahai saikorawui eina ana tharmira, hi prohona ngashitmi haili.
Ara nawui tungli leikahaina. Akachanga chingrikahai ningchangakha, morei wui eina ngareithuihaida Jesu Christali ning ngateida pheomikhavai polu. Ana krushtungli ithumwui morei vang thimikashap chithada khayon-khamang sakahai saikora ana pheomishapa. Varewui kahang nganada ana sangasak khangai chili sashap khavai seiha salu. Masoilakla akachanga chingrikahai ngarumshang mira kala chingrikahai china nali mahorhailakmara. Nawui morei shonthuimi haithanghon chingrikahai Wungnao Proho Jesu Christali kathei samphangra.
Chingrikahai china kakhanang-kakaza kala morei wui eina makanshokmi. Jesu Christana Krushtungli thikhami eina ngasoda sakazat, kakhanang kachotwui einala makar miya. Ithumna ali ithumwui Proho kala ngatangkhamena da shitkasang chitharan ithumwui morei pheokhami mang machila sokhamila ngarumshang miluishit kahaina.. Awunga Davidna hithada masotmi, “O imangla, Proholi solu, Awui sakhami saikora mamalaihaialu, nawui khayon saikora pheokhame, nawui kakaza saikorala raikhame” Proho chili. Chingrikahai Wungnaoli samkaphang chitharan, makahat lakla nawui khangachee, wuk-kakhanang kala kachot-kachang shimanser haora. Nawui mirin okathuiwui yuishi-yangshat kala raina pemting haisalala chingrikahai ning-khanganung samphangra.
Seiha Kasa: Proho Jesu, chingrikahai wungnao chi nalaka, I nawui chingrikahai ningchanga. Ina theihaira kaja iwui moreina ili nawui eina tathui ngasakada. Morei saikora chi pheomi haida iwuklung tharngasakmilu. Na iwui Proho Varena ili ngatang khamiya nada shitsangchaowa. Nana sangasak khangai ot manga chi narao ina saka. Narao ili chingrikahai chi khamilu. Amen.
You can find equivalent English tract @
