Is your name register_Thangkhul

Na okathuili rakaphara chitharan nawui ava avana nawuiming chanmiya kala nawui aming chi apong katongali shichinda mingchan saya. Chanjam sada,

  • Na worshimli kaka tharan
  • Nawui otpam kapha tharan
  • Nawui ngalei kala shim khalo tharan
  • Nawui gari khalo tharan
  • Nawui bank account kaso tharan
  • Nawui ration card kasem tharan
  • Nawui voter card kasem tharan
  • Kala nawui shimli light khuikashang tharan mingchan saya.

Siman haoki kachi okathui hili nawui mingchan chiyakha tarkar sada leiyakha kazingramliya katha rakhala? Katang makhavai kazingram chili ithum ringda leilakha mingchan sakahaina maphamei mala? Ithum okathui eina kanthui haida  chingri kahai ringkapha eina panrumra  kazingram chili. Nawui ming chan khavai atam chi arui atam hilaka.

Nawui ming chankhavai vang kathada sara khala? Nawui ming chankhavai kazingramwui shimkhur akha ngasa phalungra. Kala kathada kazingramwui shimkhur akha ngasara khala kachichi ithumna bibleli kapa samphanga. “… Awui mingli shitshangda khuikashanga saikorali ana varewui naongara ngasa khavai pangshap mi” (John 1:12). Chithada sada Jesu Christali nawui wuklungna shitshang chaolaga nawui huikhamiyana da khuishang akha Awui nao ngasa kahaina. Nana samphangran shongran chi masamphang ngashakla khrush tungli nawui mahut sada Proho Jesu Christana thimi haili. Kala kakathuma thang ringshokda khanao eina tangda kathili yuichao kahaina. Nana sakahai morei avava eina hangphatda ningatei akha Prohona huimira kala awui khalumanao sangashakra. Kala nawui wuklungli ringkapha chingri kahai eina chipem mira. Proholi khuikashanga bingli Ana hangli “…nathumwui ming kazingramli kapihaili kajiwui vang mathanlu” (Luke 10:20). Proho Jesu Christa wui mingli shitshangda lukhamashan samphang kahai bingli Varena theimiya. Kharinga tui china hanga “Varewui nao ngasa kahaiya china morei salui salui machi mana kaja Varewui asak-avat chi awuili lei…” (1 John 3:9). Chithada sada nawui vang Christana Khrustungli ngayatami kahai ashee china shapa, nana  chili chihantit laga okthui akha makashiman katang makhavai kharing samphangra.

Kazingramli ming makachan bingli okathuiwui eina kanthui haida khanaowa bichar sathanghon Prohona hangra “kachi kathawui aming kharingawui lairikli mazang thurakha chikatha mili meiwui ngaye hili horshang haolu” (Phongkhami 20:15).

Jesu Christawui ashee chiwui manga eina nawui morei pheomiya, khrush chiwui eina somida khonkashila sonthui miya. Christawui kachot kachang chiwui manga eina nawui sakazatla raimi. Prohona kathili yui haida ithumli khangacheela malei ngashak mana. Kala Chritawui manga eina nala katang makhavai kharing samphangra. Nawui mingla okathui hili maningla kazingramwui kharinga lairikli kapi shangra. Chithada sada okathuiwui eina masamphang kharara chingri kahai khamathan Prohona ngaran haili nawui vangla.  

Seiha kasa: Proho, Ina  shitshang chaoda iwui mirin tongtingda nali mihaira. Iwui morei saikora pheomi haida tharngashak milu. Khuimilu nawui nao akha sada iwui mirin peida namingli okthuika. Amen

You can find equivalent English tract @

NAWUI MING CHANHAI RALA (Is your name registered)