Thang zimikha lairik akha pakhayang tharan, leishilak kahai tuiyar samphanga. Tui chiya: “Mi saikora hi kachikatha miwui vang kachikatha akha ngasaphalungra, kachikatha ngasakhavai”. Ina tui chi paluishitta, “Mi saikora hi kachikatha miwui vang kachikatha akha ngasaphalungra, kachikatha ngasakhavai”. Kayakha ning sakaza tuiyar khala!
Ningthem awor, akap-akai na mikumowui mahut shinkahai thot hili, mikumo wui aman kasak matheimi thumana. Mayarnao kala shanaobing hi khikha maninglui mana, kha kahaka akapbingwui ‘akai’ kala ngayi wui tara chi ‘ngayutkha’ thada ngasahaowa. Kaping otsak, laasak kathem yarkahai, ngareo-ngahan kathem hikathatha hina kachikatha bingwui mingkhamayang ngayaoda mibingli ningyang ungasaka. Kha kayang-khurrei li kazatbing chungkhameina matheimana.
North Western University Medical School, USA wui Dr Donald Forman na kahang athishurda, mikumowui phasali shikachina ariwui aman hi kateokha manga. Okathuili ngaheokhayang tharan mikumo hi khikha maningmana. Makhun da sipkasa khanglaga kayakha hotnalala mibingna theikhami, machutkhami makhalei tharan naoshinaola, khararnaola ningmakatun kayakha samphanga. Athum khipakha maningmana.
Kharinga lairikli Jesuna shiman kahai yaonao wui chanjam hangchithei. Khararchan chi ithumna Luke kapikasang 15 li samphanga. Yaokahoma akhana yao shakha leisai kha yaoshangwui eina akha shimanhaowa. Kala ana yao hangchikoda chiko chi haihailaga shimankahai yao akha chili phathuihaowa. Chithada sada shongfa lamtangli kala kharar ngahongli hapkakhano, kula shikapai apong kachungkha leisalala shiman kahai yao chi phakhui phalungrada kaphana. Naolak eina ana yaochi phakhui haowa. Ana samkaphang chitharan yartuili khangkakhuilaga shimli khuiunga kala khongnainaobingli hokhuilaga hanga; “Ithum ringpharumsa kaja iwui shimankahai yaonao chi samphanghaira”. Yao akhamanga kha yao kahomawui vang khamataiyana. Jesuna hangluishitta; “I kapha yao kahomana; kapha yao kahoma china awui yaobing wui vang mangla chihomi” (John 10:11).
Nawui mirin ‘yaoshimwui eina katavali pakthui haida shimankahaiya yao chi ngamansa lapai, kapha yaokahoma wuivanga na hi aman kasaka akhana. Awui vanga okathui katonga ngarumlala nana sakmeikhara, yao kahoma wui mirin khalatdalila nana sakmei. Kharinga tuina hanga; “Ithumna morei phungda leilakha Christana ithum wuivang thimi” (Romnao 5:8). Isaiah maranli shichinlaga matuimiya “Naa mangda khalei naoli avavana malaishapta naopamwui eina kashok awui naomayarali malumashan marala? Athumna malaihai salala, Iva nali mamalaimara” (Isaiah 49:15). Ana nawui vang phaningmi dalei. Nawui mirin shongfa lamtangli mazatda mibingwui vang khikha maning salapai kha Prohowui miktali na hi aman saklaka. Na kaho kachikatha wui vang matai meikap kachi akhalaka.
Phrohowui tui sakahaiya bing, Ithum saikora thuklak eina machukyangsa. Na khikha maningmana, mibingna matheimi mana, mamachutmana, nali khipakhana shaklak eina makhuimana kala bhap matami mana da phaningsalapai, nali atam kachida shaklak eina phaningkhame Proho Jesu Christa leili. Kala hiwui pongli phapta khui ngashak ngaichaowa. Awuivanga na hi kankhui khangayi, thimi khangayi, sak-khamataiya aman kasaka akha laka. Na prohowui vang kayakha shak matai hao khala. Nali kankhui khavai thimiya; nali pheomikhavai kala chingri kahai mikida ringa. Awuili khamathan,ningyang khaung leiya. Jeus Christali phakhuilu makahat lakla awui nao ngasalakra.
Nana phaning salapaiya, “Iya katavali vahaira, kachihanla maleiluimana, makapha makhaya moreiwui rao ngasachao haira kala I khangachon samphang kapai apong maleilui manada,” kha naoshinao-khararnao makhaila mi kachungkhana Christawui manga eina kadhara mirin, chingrikahai, khamathan, kachihan, mirinwui kakhalat samphanghaira. Christali zangda kharingwui kankhana makhangapat wui tuina. Nawui mirin atam leilakha Jesu Christali horsangakha makahatlakla katang makhavai kharing samphangra.
Seiha Kasa: Proho, Iya morei kaphungana. Ili kha pheomilu. Iwui sakashap maleimada nawuili kharana. Nana ili leishi kachi ina shitshanga, Kanthuikahai mirin chiwui eina ngareithui haida nawui thishur khavai rali, narao ili khangachon milu. Iwui ngatangkhame Varena kachi iwuklungna shitsangchaoa. Iwui mirin napangli horsangli. Amen
You can find equivalent English tract @
