THIKHAVAI KHARINGLA? MANINGMANA, MASHIMANDA RINGRA
(Live to die no live forever)
Awor kathem hina apong tarakhali manga vangasakhaira, khamasai kazing eina tangda lila ayangkakhui samphang ngasaka, kha kathi kaho wui pongli mathalak eina kala vashunglak eina tamkhayang maleiranga. Lairik kathema kala ningwor kathema kaikhana kathi kahowui maram chili kala thikahai wui thili khi shok khala kachi teomeikha tamyanga. Ningwor kathem bingna meisa eina okathui wui maramli, phasarinli, zimik kachang sira wui maramli mathalak eina tammiya kha mi saikorana samphang phalungki kaji, thiuki kachiwui maramli kateokha mang hangchithei. Mi kateokha mang na kathi wui maramli tammikashap kala theikhangaina kha kathi kaho hina kathem, kashang kala kacham saikorali ngaraidalei; khipakhana kathi wui eina yamhaikapai maning mana. Kakhanang-kakaza, kachot, sikafa, khangachee, wuk-kakhanang kala ningkachang hikathatha hi kathi kaho china mamayuisang ranglakha kathei samphanga. Ithumli phara kakhuiwui (naopam wui eina shokthanghon) vang kathi kaho hili mayakhangarok kahaiwui amaha kachithei kathana. Ningkachang maningkachangwui tui malei lui mana. Kharinga tuina hanga, “Mi saikora morei saser haoda Varewui tekkhamatei chili makashungrar mana, kachiwui vang khala kaja moreiwui saman kathina” (Romnao 3:23; 6:23). “Mi saikora akhashida thipahalungra” (Hebrewnao 9:27). Mi kachiva thisera kala aja ithumna Vare wui eina pakthui haiakha, ithum katang mavaila awui eina pakthuihaora. Ithum katang mavaila mirinwui lemmet: leikashi, khamathan, khamatha, khamashung, chingri kahai kala ringkapha chi shiman haora kala kathiwui kachot kachang china rekharekda malungkharing, tangkhamang, maikashi kala wuk-kakhanang chi katang mavaimara.
Mi akhamangna kathi wui eina khalamishapa; kadhara kala kharinga mirinwui shongfa chi ithumwui ngatangkhami Jesu Christana. “Ana kathiwui pangshap shiman ngasakhaira, kala paokapha wui manga eina makathi mirin chi phongmihaira” (II Timothi 1:10). Thotrinchan kuimareida awui maramli chithei kala ana okathuili khara hina thotrinchan hi B.C kala A.D ngasa ngasaka. Ithumwui morei wui vang thimida, Kharing kala kathi kaho chila ana chitheimi. Vare wui pangshap china morei kala Kathi kaho chili yuikhuimida ringngasaka. Aja Okathui kuimareida Paokazatbing kachungkhana Proho Jesuwui ringkhaluiwui shakhi mi. “Kharing chi Ina; I thihailaga, yanglu ara mashimanda ringdalei kala kathi eina kazeiramwui pangshap lei” (Phongkhami 1:18)
Jesu Christana krush tungli thikhami chitharanla ngahuiri nimsorhai. Mi saikora wui vang thimi. Kala ana thikhami manga eina kathiwui pangshap kasinga chipee chili shiman ngasaka. Kathili khangachee wuivang eina athum mirin peida rao sakasabingli ningkhan ngasaka (Hebrewnao 2:9,14,15).
Jesu Christa na okathuili leilakha kharing, kathi kala kathi-makhavai wui maramli mathalak eina tamchithei. Jesuna marai kapai kazat raimida Proho hi ringkhaluiya kala kharingana da chitheimi, kathili ringasaka, khangapeoli theingasak, khangakhokali shangasaka kala sheikasha li zatngasaka. Vareli ningkhamaong malei khavai shitkasang chi ana tamchithei kala ali ngachonmi khavai khangakao bing chili matakhak eina ungshungmi. Makahatlakla ringluira kachi wui maramli tamchithei. Ana ningtonglak eina ithumwui morei phungmi kala ithumwui kathi saman chi krushtungli khuivami. Jesu Christana ringluishitda awui sashap pangshapla ithumli theikhui ngashaka kala ana shongfana, khamashungana kala kharingana da shitsang ngashaka.
Jesuna kharing shongfana: ithumli avava varevara wuili thanvami, chang khayang lila yuingasaka kala kathi eina tangda mangacheela katang makhavai kharing ngashitmi.
Khamashungana: Nawui mangla na kahaoda khalei kala moreili khalap kahai wui eina ningkhan ngasaki kachi khamashunga chi Jesuna.
Kharingana: Kathi kaho china mayuikharara, mashiman kapai kala kathi makhangava kharinga chi Jesuna.
Thurching kahai kathi kaho china nawui mangla khuikhavai kazat eina, kalashat eina, maningkha asarlam eina khuikida lei. Katang makhavai kathi chili mangarum rang lakha Jesu Christali khuisanglu. Jesuna hanga, “Iya ringkhaluiya kala kharingana. Kachi kathana ili shitsangakha, thihaisalala ringra” (John 11:25). Proho Jesu Christali shitsanglu, nawui morei hangphatlu, Jesuli nawui ngatangkhamina da khuisanglu. Kathi kaho chi pangshap malei mara kaja Varewui mangla kathara china kathi wui eina ringasaka.
Ralu, nganalu kala tamkhuilu. Khamashung china morei kala kathi wui eina nali ningkhan ngasakra. Ringkhaluiya kala kharinga Jesu Christana nali arui hodalei.
Seiha kasa: Leikashiya Proho Ishamei, Ina theikhui haira kaja iwui mirin hunkhamanga, iya morei kaphungana. Iwui sina-lupa lan kala ngasotnaobing na ili makankhuirar mara. Iwui wuklungna sifa khanangda nawuili kharana. Iwui morei hangphada ili khapheomiluda poli. Nawui sokhami chi samphang pai khavai nawui mangla kadharwui ngakui khamichi atamkachida leimichinglu. Amen
You can find equivalent English tract @
THIKHAVAI KHARINGLA? MANINGMANA, MASHIMANDA RINGRA (Live to die no live forever)
