11 / 100

Is your name register_Tulu1

Download PDF Tracts

ನಿನ ಪುದರ್ ಪರಲೋಕದ ರೆಜಿಸ್ಟ್ರಡ್ ಬರೆದುಂಡಾ?

ಈ ಲೋಕೊಡು ಈ ಪುಟ್ಟಿನಪಗ ಅಪ್ಪೆ ಅಮ್ಮೆ ನಿನ ಪುದರ್‌ನ್ ಪುಟ್ಟು-ಸಾವುದ ರಿಜಿಸ್ಟ್ರಿ ಆಪೀಸ್‌ಡೆ ಬರೆಪಾವೆರ್. ಮಾತ್ರತ್ತಂದೆ ಬೊಕ್ಕ ಬೇತೆ ಕಡೆಟ್‌ಲಾ ನಿನ ಪುದರ್‌ನ್ ಬರೆಪೆರ್. ಉದಾಹರಣೆಗ್:

    • ನಿನನ್ ಶಾಲೆಗ್ ಸೇರಾವುನಗ
    • ಈ ಕೆಲಸೊಗು ಸೇರ್‌ನಗ
    • ಈ ಇಲ್ಲ್ – ಜಾಗ್ ಖರೀದಿ ಮಲ್ಪುನಗ (ದೆತ್ತೊನುಗ)
    • ನಿನ ಗಾಡಿಗ್  ಇನ್ಶೊರೆನ್ಸ್ ಮಲ್ಪುನಗ
    • ಬೇಂಕ್‌ಡ್ ಖಾತೆ ಸುರು ಮಲ್ಪುನಗ
    • ರೇಶನ್ ಕಾರ್ಡ್ ದೆತ್ತೊನುಗ
    • ಓಟುದ ಗುರ್ತ ಚೀಟಿ ದೆತ್ತೊನುಗ
    • ನಿನ ಇಲ್ಲ್‌ಗ್ ಕರಂಟ್ ದೆತ್ತೊನುಗ

ನಾಶಾದ್ ಪೋಪಿ ಈ ಲೋಕೊಡು ದಿನ ದೆಪ್ಪೆರೆಗಾದ್ರ ನಿನ ಪುದರ್‌ನ್ ಈ ಮಾತ ಕಡೆಟ್ ಬರೆವೊಡಾಂಡ, ಪರಲೋಕದ ವಿಚಾರ ದಾನೆ? ನಿನ ಸಾವುಡ್ದು ಬೊಕ್ಕ ಪರಲೋಕೊಡು ಈ ಏನೀತೇನಿಗ್‌ಲಾ ಸಂತೋಷ-ಸಮಾಧಾನೊಡು ಉಪ್ಪೋಡಾಂಡ ಅಲ್ಪ ನಿನ ಪುದರ್‌ನ್ ಇತ್ತೆನೇ ಬರೆಪಿನವು ಅಗತ್ಯ ಉಂಡತ್ತಾ? ಅಂದ್ ಖಂಡಿತಾದ್ ನಿನ ಪುದರ್ ಇತ್ತೆನೇ ಬರೆದುಪ್ಪೊಡು.

ಅಲ್ಪ ನಿನ ಪುದರ್ ಬರೆವೊಡ್ಡ ಈ ದಾನೆ ಮಲ್ಪೊಡು? ನಿನ ಪುದರ್ ಅವುಲು ಬರೆವೊಡ್ಡ ಈ ದೇವೆರೆನ ಪರಲೋಕದ ಕುಟೊಂಬೊಡು ಒರಿ ಆದ್ ಪುಟ್ಟೊಡು. ಉಂದೆತ್ತ ವಿಚಾರಾದ್ ನಮ ಸತ್ಯವೇದೊಡು ಇಂಚ ಓದುವ – “ ಆಯನ್ ಅಂಗಿಕಾರ ಮಲ್ತ್‌ದ್ ಆಯ ಪುದರ್‌ಡ್ ನಂಬಿಕೆ ದೀಪಿನಕ್ಲೆಗ್ ದೇವೆರೆ ಬಾಲೆಲು ಪನ್ಪಿನ ಅಧಿಕಾರೊನು ಕೊರ್ತೆ. (ಯೋಹಾನೆ 1:12) ನಿನ ಪೂರ್ತಿ ಉಡಲ್‌ಡ್ದ್ ಈ ಕರ್ತವೆ ಆಯಿ ಯೇಸುನು ನಂಬುದು ನಿನ ಸ್ವಂತ ರಕ್ಷಕೆಲಾ ಧನಿಲಾ ಆದ್ ಆಯನ್ ಅಂಗಿಕಾರ ಮಲ್ಪುವಡ ಈಲಾ ಆಯನ ಬಾಲೆ ಆಪ. ನಿನ ಪಾಪೊಲೆಗಾದ್ ನಿಕ್ಕ್ ಬರೊಡಿತ್ತಿ ಶಿಕ್ಷೆನ್ ಆಯೆ ತನ ಮಿತ್ತ್ ದೆತ್ತೊಂದು, ಕಲ್ವಾರಿದ ಕ್ರುಸುಡು ನಿಕ್ಕಾದ್ ಸೈತ್‌ದೆ. ಆಯೆ ಸೈತಿನಿ ಮಾತ್ರ ಅತ್ತಂದೆ ಮೂಜನೇ ದಿನೊಟು ಜೀವೊಡು ಲಕ್ಕ್‌ದ್ ಬತ್ತೆ; ಏನೀತೇನಿಗ್‌ಲಾ ಜೀವೊಡುಪ್ಪುನಾಯೆ ಆದುಲ್ಲೆ. ನಿನ ಎಲ್ಯ ಪ್ರಾಯೊಡ್ದಿಂಚಿ ಈ ಮಲ್ದಿನ ಮಾತ ಪಾಪೊಲೆನ್ ಈ ಒಂಜೊಂಜಾದ್ ಆಯಗ್ ಅರಿಕೆ ಮಲ್ತಡ, ಆಯೆ ನಿನ ಪಾಪೊಲೆನ್ ಮಾಪು ಮಲ್ತ್‌ದ್ ಆಯನ ಬಾಲೆ ಪಂಡ್ದ್  ಅಂಗಿಕಾರ ಮಲ್ಪುವೆ. ನಿನ ಉಡಲ್‌ಡ್ ತನ ಸಂತೋಷ ಸಮಾಧಾನೊಡು ದಿಂಜಾವೆ. ಆಯೆ ಈ ಲೋಕೊಡುಪ್ಪುನಗ ಈ ರೀತಿಡ್ ತನ ಬಾಲೆಲಾಯಿನಕ್ಲೆಗ್ ಪನ್ತೆ “ ನಿಕ್ಲೆ ಪುದರ್ ಬರೆತಿನವು ಆದುಂಡು ಪಂಡ್ದ್  ಸಂತೋಷ ಮಲ್ಪುಲೆ.” (ಲೂಕೆ 10:20) ಕರ್ತವೆ ಆಯಿ  ಯೇಸುನು ನಂಬುದು ತನ್ಕ್‌ಲೆ ಪಾಪೊಲು ಮಾಪು ಆತಿನಕ್ಲೆನ ಪುದರ್ ಪರಲೋಕೊಡು ಬರೆದುಂಡು. ಬೊಕ್ಕ ಸತ್ಯವೇದೊಡು ಬರೆತಿಲೆಕ್ಕ “ದೇವೆರೆಡ್ದ್ ಪುಟ್ಟಿನಾಯೆ ಏರ್‌ಲಾ ಪಾಪ ಮಲ್ಪುಜೆ.(1 ಯೋಹಾನೆ 3:9) ಪಾಪ ದಿಂಜಿದಿ ಈ ಲೋಕೊಡು ನನ ದುಂಬುಗು ಪಾಪ ಮಲ್ಪಂದೆ ಶುದ್ದ ಜೀವನ ಮಲ್ಪೆರೆ ಬೋಡಾಪಿ ದಯೊನು ಅಕ್ಲೆಗ್ ಕರ್ತವೆ ಆಯಿ ಯೇಸು ಒದಗಾವೆ. ಬೊಕ್ಕ ಯೇಸು ಕ್ರುಸ್ಸುಡು ಸೈತಿನಪಗ

ನಿನ ಪಾಪೊಲೆನ್ ಮಾತ್ರತ್ತಂದೆ ನಿನ ಮಾತ ಸೀಕ್‌ಲೆನಲಾ ತುಂಬೊಂದೆ. ಅಂಚಾದ್ ಆಯನ್ ನಂಬುನಕುಲು ರೋಗೊಲೆಡ್ದ್‌ಲಾ ಬುಡುಗಡೆ ಆದ್ ಆರೋಗ್ಯೊಡು ಬದ್‌ಕೆರೆ ಆಪುಂಡು.

ಇಂಚ ಉಪ್ಪುನಗ, ಪರಲೋಕೊಡು ತನ್ಕ್‌ಲೆ ಪುದರ್ ಬರೆದ್ ಉಪ್ಪಂದಿನಾಕ್ಲೆ ಅಂತ್ಯ ಎಂಚಿನ? ನ್ಯಾಯತೀರಿಕೆದ ದಿನೊಟು ಅಂಚಿತಿನಾಕ್ಲೆ ಸ್ಥಿತಿತ್ತ ವಿಚಾರೊಡು ಇಂಚ ಬರೆತಂಡ್ – “ಏರೆ ಪುದರ್ ಜೀವದ ಪುಸ್ತಕೊಡು ಬರೆತ್ತಿನವು ತೋಜ್‌ಜಿಡ ಆಯನ್ ತೂತ ಕೆದುಕ್ಕು ಪಾಡ್ವೆರ್. (ಪ್ರಕಟಣೆ 20:15)  

ಯೇಸು ಕ್ರಿಸ್ತನ ನೆತ್ತೆರ್‌ ನಿನ ಪಾಪೊಲೆನ್ ದೆತ್ತ್‌ದ್ ಪಾಡ್ದ್ ನಿಕ್ಕ್ ಮಾಪು ಆಪುಂಡು. ಆಯನ ಕ್ರುಸ್ಸು ನಿನ ಶಾಪೊಲೆನ್ ದೆತ್ತ್‌ದ್ ಪಾಡ್ದ್ ನಿಕ್ಕ್ ಆಶೀರ್ವಾದೊಲೆನ್  ಕೊರ್ಪುಂಡು. ಆಯಗಾತಿನ ಪೆಟ್ಟ್‌ಲೆಡ್ದ್ ನಿಕ್ಕ್ ನಿನ ರೋಗೊಲೆಡ್ಪ್ ಸುಖೊನು ಕೊರ್ಪುಂಡು. ಆಯನ ಸಾವುಡ್ದು ನಿನಡುಪ್ಪು ಸಾವುದ ಪೋಡಿಗೆನ್ ದೆತ್ತ್‌ದ್ ಧೈರ್ಯೊನು ಕೊರ್ಪುಂಡು. ಯೇಸುನ ಜೀವದ ಮುಖಾಂತ್ರ ನಿಕ್ಕ್ ನಿತ್ಯದ ಜೀವ ತಿಕ್ಕುಂಡು. ನಿನ ಪುದರ್ ಈ ಲೋಕೊಡತ್ತ್ ಪರಲೋಕೊಡುಪ್ಪು ಜೀವದ ಪುಸ್ತಕೊಡು ಬರೆತಿನವು ಆಪುಂಡು. ಈ ಲೋಕ ಕೊರಿಯೆರೆಗಾವಂದಿನ ನಿಜ ಸಮಾಧಾನ-ಸಂತೋಷೊನುಲಾ ಸಾವುಡ್ದು ಬೊಕ್ಕ ಪರಲೋಕೊಗು ಪೋಪಿನ ಸೌಭಾಗ್ಯಲಾ ನಿಕ್ಕ್ ತಿಕ್ಕೆರೆಗಾದ್ರ ಇನಿಯೇ ಕರ್ತವೆ ಆಯಿ ಯೇಸು ಕೈತಡೆಗ್ ಬಲ್ಲ. ಆಯ ಮಿತ್ತ್ ನಂಬಿಕೆ ದೀದ್ ಈ

ಪ್ರಾರ್ಥನೆನ್ ಪನ್ಲ – “ ಕರ್ತವೆ ಆಯಿ ಯೇಸು ಯಾನ್ ನಿನನ್ ನಂಬುವೆ, ಎನ ಇಡೀ ಜೀವನೊನು ನಿಕ್ಕ್ ವಶ ಮಲ್ಪುವೆ. ನಿನ ಪರಿಶುದ್ದ ನೆತ್ತೆರ್‌ಡ್ ಎನ ಮಾತ ಪಾಪೊಲೆನ್ ದೆಕ್ಕ್‌ದ್ ಎನನ್ ಶುದ್ದ ಮಲ್ಪುಲ. ನಿನ ಬಾಲೆ ಆದ್ ಎನನ್  ಸ್ವೀಕಾರ ಮಲ್ತ್‌ದ್ ಇತ್ತೆನೆ ಎನ  ಪುದರ್‌ನ್  ಪರಲೋಕೊಡು ಬರೆಲ. ಇನಿಡ್ದ್ ಬೊಕ್ಕ ಎನ ಜೀವಮಾನ ಕಾಲ ಇಡೀ ಯಾನ್ ನಿನ್ನ ಬಾಲೆ ಆದ್ ಬದುಕುವೆ. ಆಮೆನ್.

 

You can find equivalent English tract @

Is your name registered ?