Mikumowui mirinli lanla, aworla, khayala leisher saye chilala ngasam kakhui, ringkapha kala chingrikahai makapei mana. Mikumo akha sada khamathan kala chingri kahai samphang khavai tarakha hotnaya, sina lupa lan shichinda sakhangaingai salaka phasawui ringkaphala phaya, kha kankhana masamphang mana. Hikathatha hina manglali chingri kahai malei ngashak mana. Phasali kathi rashung ngashakada ningkhangasharla malei mana.
Vare varana mikumoli kasem chitharan Awui zakyui khuida sakakhui mang machila ringkapha, chingri kahai, phasa khamatha kala katang makhavai mirinla miya. Kha mikumona Varewui ningkhami kaida morei sakahai chitharan awui sokhami kashiman mang machila kathi, khangachee kala ningkharak rashunga kala hikathathawui raopam pamda phasali ngachan ngashak laga marai kapai kazatla kaza haowa.
Kala kazat ngahada ariyur ngatei ngateida kala kameo kasam kashokwui apong ngatei ngatei sasaejilala kalikhala raichao kahai masamphang mana. Chili langda ari-arai chungnada shichin kahai vang kazat kadhar dhar kakaza thada khanong bingwui vangla ngahashimei khangai ngaha shimei haowa. Kala hikathatha kachot kachang phungda 20th century hili kazat chi raimi kashap khanong maleisani khalada pungapalak eina leidalei.
Ngasotnao bing, ithumna khanong hangshangli; nana Ali shitshangda ra-akha Ana nawui vang shapa. Mikumo ithumbingwui vang phameikap kachi khanong china. Awui ming Proho Jesu Christa hoi. Ana hanga “nathumwui raikhamiya Proho chi ina” (Exo.15:26). “… Ana ithumwui kakaza saikora khuithuimiya kala ithumwui kazat saikora phungmiya” (Isa.53:5; Matt.8:17). Ana ithumli hanga, “kakhanang kala ot kharit kaphungbing saikora iwuili ralu, Ina nathumli ngasamkhui ngashakra” (Matt. 11:28). Jesu Christana morei, sakazat, khonkashi kala kathi eina tangdali yui haira. Kala Ali shitkashanga bingwui vang katang makhavai kharing samphang khavai ngarai kacha saman chi ngashit mihaili.
Nana Proho Jesu Christali changda nawui morei hangphat akha kala Proho Jesu Christa hi nawui huikhame nada mayachao haiakha morei pheokhami mang machila wuklungli chingri kahai samphangra. Phasali kakhanang kakaza chila khuithui mihaida raichao haora. Hithada kapi haili, “Ana nawui khayon pheomi, kakazala raimi, Akhurwui eina ngatangkhuimi kala makhangacheiya leikashi lukhamashan ngarormi” (Psa. 103:3,4). “Ana kahang eina kazat raimi, shimanki kachiwui eina kankhui” (Psa.107:20). Vare tui china hanga, “Moreili thihailaga khamashung khangarong ot sakhavai, Christa akhalata ithumwui morei aphasali ngasoda thingtungli phungmihaira” (I Pet.2:24).
Jesuna kaza kahai bingli theida lumashanlaka; Ana pharei kakaza mi tharali raimi, zingkum tharada khani ashee ngayada kaza kahai shanao pawui kazat chi Jesuna raimi. Christali shitshangda khara kakazabing kachivali raimi; mik-khangapeo bingli theingashaka, khana khangakhok bingli sa ngashaka, khak khangasu bingli matui ngashaka kala sei kasu bingli zat ngashaka kala kathilila ringshok ngashaka. Proho Jesu Christa hiya chichinga ayala, aruila kala khanao eina tangda makhangacheiyana. Aja eina tangda Christana maraimi kashap malei mana.
Mikumowui phasali kakhanang kakaza tharan ari-arai tarakha shichina kha Jesu Christana raingashaka. Prohona phasawui kakaza mang machila ningwui kala wuklungwui kazatla raimi shapa. Ali khara kachiva makashiman katang makhavai sokhami samphanga.
Ningli kala wuklungli kachot kachang phungda khanangda khaleiyabing, Proho Jesu Christawuili ralu, nawui morei saikora Prohowui miktali hangphatda seiha salu:
Proho, Ina shitshanga kaja nana khrush tungli thikhami manga eina iwui morei pheokhami mang machila iwui kakhanang kakazala kharai samphang rada. Khalumashan mida iwui kazatla raichao ngashak milu. Iwui mirin tharngashak mida nawuinao sangashak milu. Amen
You can find equivalent English tract @
