Nali khipana leishimei thui khala kachi na theila? Leishimei thui kachipa chiya sashap pangshapa Vare, ithumli kasa akhava china (phongkhami 1:8; Haokaphok 1:26,27; 2:7). Kala katang makhavai Vare hina nali leishina kahaiwui vang Jesu Christa, Awui akhamang kachiya naoho naotong chi khrush tungli thimida nawui morei pheomi khavai chihorai (Luke 23:34).
Varena nali khiwuivang chiyakha leishihao kachi na theila? Maramva Vare hiya leikashiyana, Ana nali Awui zakyui khuida sakhui. kala nawui mangla mathilak mara chithada sada Varewui vangva nawui manglana mataimeiya okathuili.
Varena nali leishiya, kha moreili yangkharinga kala bichar sai. Moreina wuklungli khanang ngashaka, ana nali prohowui eina ngapakthui ngashaka. Atam rashungda bichar sathanghon Proho Jesu Christana morei kaphunga bing chili hangra, ‘he khonshi kahaibing nathum iwui eina thuihaolu kala chipee eina awui kazingrao bingwui vang ngaran kahai katang makhavai meifa chili vaulu”, “…kha khamashung bingna katang makhavai kharing pamli vara” (Matthew 25:41, 46).
Kachiwui vang khala chilaga, khare mikumo Adam china Varewui kahang makhanganawui vang morei, khonkashi, sakazat kala kathi hi okathuili rashunga. Chithada sada ithum saikora morei phungshera kala hiwui shongrana katang makhavai meifana. Kha thasaejilala, ithumli kasa akhava Vare china mikumoli leishina kahaivang Jesu Christawui thikhami manga eina ngatangkhui miya kala Adamna kahang makhanganawui eina shiman kahai sokhami hupta khuishang milui shita.
Jesu Christana thikhamiwui vang na shongran masamphang ran mana, kha nana Proholi shitshang akha katang makhavai kazingramli ringrumra. “kachiwuivang khala kaja moreiwui saman kathina, Kha Varewui lemmet chiya Ithumwui Proho Jesu Christawui lungli katang makhavai kharing china” (Romans 6:23).
Varena nali kayakha leishi khala kachi nana theiya kaja Varena nali kankhui khavai Awui kazingrao mashiratra mana, kha Awui akhamang kachiya nao mayara chi nali ngatangkhui khavai okathuili phami. Jesuna hanga, “khikhalajila Varena apuk-apagvali leishina kahaiwui vang awui naohonaotong chi mi, khikhalajila ali shitkashanga mi kachiva kashiman mavaila katang makhavai kharing samphangra” (John 3:16). Kha thasaejilala, Vare hiya kadhara kala khangarongana. Chithada sada “mapharaluishit akha khipanakha Varewui wungram matheirar mara” (John 3:3; Romans 3:24-26). Jesuna hanga, “ningateilu kala paokapha chili shitshanglu” (Mark 1:15).
Leikashiyabing, Jesu Christana nawui vang thikhami chili shitshanglu kala ningngateilu, Proho Jesu Christana Iwui ngatang khamina kachihi wuklungna maya phalungra. Jesu Christana ngayuda khami ashee chiwui manga eina Varena nawui morei pheomi haira. Nana Vare tuichili kahang khangana chitharan mangla kadhara china nali wuklung kadhar mida midhar sangashakra. Ana nali dhar ngashak haida leikashi, khamathan, chirngri kahai, thangmet kala pangshap ngarumshang mira, mangla kadhara china kathanla thanmida awui wungrum tekmatei ngashakra.
Prohona leikashiya bing, sashap pangshapawui kahang nganalu. Ningngateilu atam leilakha. Nawui mirin akha manga, kasuirak kula kashi samphangpai kaja atam chi nana mashing mana. Lumashan katheiya vare china katang makhavai kharing samphang khavai khangaran kasa atam midalei. Varewui pheokhami maning akha kathi makhavai mangla khamit makhavai meilungli horshang haora (Mark 9:47.48). Mi saikora akha shida thiphalungra kala thikahaiwui thili pheokhami mangavalui mana kha saikora bichar pamli kanganingra (Hebrews 9:27). Jesu Christana kharingwui shangfana, nana thihaisalala ringshok ngashakra kala nana sakahai chiwui athishurda bichar sara (John 11:25; John 5:24-29). Machuksa atam leilakha, thikahai tharan Proholi samphang phalungki kachina kala bichar pamli kanganing phalungra.
Na morei kaphungana kachichi khuishanglu. Na Proho Jesu Christawui ngatang khami chi tarkar sai, Awui ngatang khami manga eina Varewui malung khavat shongran masamphang mara. Nawui wuklung tongtingda Proholi polu.
Seiha kasa: Leikashiya Proho, Pheomilu ili, I morei kaphungana, chithada sada Proho nawui lukhamashan tashung milu. Iwui morei saikora hangphatda nawuili latungli arui atam hitharan. Vare! Ina shitshang chaowa kaja Proho Jesu Christana okathuili rada khrush tungli thikhami chili iwui sharukla changada. Iwui morei tharmi haida nawui nao sangashak milu. I wuklungna Jesu Christahi Iwui huikhamiya kala iwui mirina da shitshang chaowa.
Amen
Theikhangaye: Kayakha khamahai khala karinga Varewui nao ngasada! Proholi ningshiya atam kachida makar khami vang.
You can find equivalent English tract @
